O E3 aposta por manter a súa data de celebración

O COVID-19 avanza polo mundo a un ritmo vertixinoso. Os medios foron cubrindo a súa expansión aos poucos e as noticias cada día cóntanse por miles. Onte, mércores 4 de marzo, Los Ángeles declaraba o estado de emerxencia por mor do coronavirus e a súa aparición na cidade americana. Corre o E3 perigo? A Electronic Software Association quixo despexar as dúbidas dos asistentes e interesados.

Segundo declaracións realizadas a GamesIndustry, os responsábeis da feira aseguran que «a saúde e a seguridade dos nosos asistentes, expositores, socios e persoal é a nosa principal prioridade. Malia que a ESA continúa planificando un show E3 seguro e exitoso de o 9 ao 11 de xuño de 2020, estamos a monitorar e avaliando a situación a diario». É dicir, polo momento, haberá E3 nas datas previstas.

Esta primeira afirmación non quita que nuns días a organización poida dar marcha atrás, aconsellados polos Centros para o Control e a Prevención de Enfermidades de Estados Unidos ou a Organización Mundial da Saúde. «Estamos a avaliar activamente a información máis recente e continuaremos desenvolvendo medidas para reducir aínda máis os riscos para a saúde no show de xuño», sinalan.

Lembra fuxir do alarmismo e o sensacionalismo e, en caso de estar en zonas con risco de contaxio, seguir as recomendacións de prevención e hixiene que recomendan os CDC.