Reportaxes Unha volta á escola moi difícil :: Principais lanzamentos de setembro

Unha volta á escola moi difícil :: Principais lanzamentos de setembro

Setembro, ese mes que adoita funcionar como reinicio profesional do ano e que en máis dunha ocasión ameaza con quitarlle o posto a xaneiro para exercer de cadro de saída, antóllase como un dos períodos máis potentes en canto a lanzamentos de videoxogos. Despedido o verán, os estudios e as editoras comezan a encarar a recta final do ano e a propoñer os seus últimos disparos, que tamén ocuparán un lugar privilexiado nas compras do Nadal.

PlayStation 4, Xbox One, Nintendo Switch e PC. Todas as plataformas recibirán títulos de relevancia. Algúns agardados durante anos, como é o caso de Gears 5, a famosa franquía exclusiva de Microsoft, que por fin verá a luz. Tamén fará acto de presenza Borderlands 3, que ameaza con ser o looter-shooter definitivo para os amantes da marca creada por Gearbox. Nintendo, pola súa banda, gozará da chegada de The Legend of Zelda: Link’s Awakening, revisión do lendario título de Game Boy.

Hai máis, claro. Monster Hunter World recibirá a expansión Iceborne, que non faltou a ningunha das grandes feiras do videoxogo deste ano, e que será un bálsamo curativo para unha comunidade ansiosa de novo contido. No ámbito deportivo, unha serie de citas obrigadas: NBA 2K20, NHL 20 e FIFA 20. EA Sports e 2K Sports fixeron os deberes e presentarán este mes as franquías por excelencia de baloncesto, hóckey e fútbol. Tamén está por aí The Surge 2, continuación da aventura creada por Deck13 Interactive con fortes inspiracións na saga Souls, que foi gañando enteiros e músculo nos seus avances.

Ademais, tamén chega Catherine: Full Body, a versión estendida dese Catherine de 2011. Aterrará nas tendas Spyro e a súa triloxía renovada en PC e Switch, do mesmo xeito que Final Fantasy VIII Remastered en todas as plataformas. Trópico 6, após o seu paso por PC, tamén aparecerá en consolas. Máis? Ese belo e imperdible Ori and the Blind Forest, que chegará á máquina híbrida de Nintendo nos últimos días do mes.

A continuación, podes consultar unha lista cos principais lanzamentos deste mes recentemente comezado:

Xogo Plataforma Data de lanzamento
Catherine: Full Body PS4 3 de setembro
Phoenix Point PC 3 de setembro
Final Fantasy VIII Remastered PS4, Xbox One, PC, Switch 3 de setembro
Spyro Reignited Trilogy PC, Switch 3 de setembro
Monster Hunter World: Iceborne (Expansion) PS4, Xbox One 6 de setembro
NBA 2K20 PS4, Xbox One, PC, Switch 8 de setembro
eFootball Pro Evolution Soccer 2020 PS4, Xbox One, PC 10 de setembro
Gears 5 Xbox One, PC 10 de setembro
Greedfall PS4, Xbox One, PC 10 de setembro
Borderlands 3 PS4, Xbox One, PC 13 de setembro
Daemon X Machina Switch 13 de setembro
NHL 20 PS4, Xbox One 13 de setembro
AI: The Somnium Files PS4, PC, Switch 17 de setembro
Lego Jurassic World Switch 17 de setembro
The Legend of Zelda: Link’s Awakening Switch 20 de setembro
Ni no Kuni: Wrath of the White Witch (Remaster) PS4, PC, Switch 20 de setembro
Baldur’s Gate: Enhanced Edition PS4, Xbox One, Switch 24 de setembro
Baldur’s Gate II: Enhanced Edition PS4, Xbox One, Switch 24 de setembro
Contra: Rogue Corps PS4, Xbox One, PC, Switch 24 de setembro
Planescape: Torment: Enhanced Edition PS4, Xbox One, Switch 24 de setembro
The Surge 2 PS4, Xbox One, Switch 24 de setembro
Darksiders II: Deathinitive Edition Switch 26 de setembro
Gunvolt Chronicles: Luminous Avenger iX Switch 26 de setembro
Code Vein PS4, Xbox One, PC 27 de setembro
Dragon Quest XI S: Echoes of an Elusive Age – Definitive Edition Switch 27 de setembro
FIFA 20 PS4, Xbox One, PC, Switch 27 de setembro
Ori and the Blind Forest Switch 27 de setembro
Tropico 6 PS4, Xbox One 27 de setembro

 

Carlos Pereiro
Carlos Pereiro

Creador de Morcego. Escribo cousas, falo de cousas e encántame escoitar cousas.

Deixar un comentario

O teu enderezo electrónico non se publicará Os campos obrigatorios están marcados con *