Bungie revela a folla de ruta para Destiny 2 até 2022

A próxima expansión de Destiny 2 chegará o 22 de setembro. Así o confirmou Bungie após a filtración de información relacionada co novo contido. Levará por título Beyond Light.

Ademais, a compañía responsábel deste looter-shooter revelou o nome das expansións que irán aterrando ao longo dos próximos dous anos: The Witch Queen, no 2021; e Lightfall, no 2022. Segundo sinalou Bungie, para que o xogo non metre até un tamaño absurdo realizaranse rotacións de contido segundo a expansión activa nese momento. Este método de xogo foi bautizado como Destiny Content Vault.

Amais de manteren un tamaño alcanzable para os xogadores, os deseñadores aproveitarán estas rotacións para revisar e actualizar as misións que se retiren temporalmente do xogo —sobre todo as menos xogadas— . Doutra banda, dentro desta nova forma de estrutura, parte do contido do primeiro Destiny volverá estar dispoñíbel.

Paga a pena lembrar que Destiny 2 xa confirmou hai varias emanas a súa presenza na nova xeración, onde correrá a 4K e 60 fps, amais de contar con xogo cruzado interxeracional entre a mesma familia de sistemas. Ao longo do 2021, Bungie quere que o cross-play sexa total entre todas as plataformas.