Actualidade Death Stranding tería finalizada a súa historia pero aínda se está a pulir o seu mundo

Death Stranding tería finalizada a súa historia pero aínda se está a pulir o seu mundo

O misterio que rodea o próximo xogo de Hideo Kojima, Death Stranding, roza o absurdo tal e como os usuarios de foros e redes sociais foron comentando ao longo dos últimos meses. Sábese que é unha aventura de mundo aberto, aínda que os seus crípticos tráileres e as súas descoñecidas mecánicas non permiten saber con exactitude que faremos ou que non faremos durante o tempo que dure a partida.

Nunha entrevista publicada esta semana a J-Wave, o director xaponés revelou algúns detalles sobre o desenvolvemento do videoxogo. O primeiro ten que ver coa súa historia, unha narrativa que estaría xa totalmente finalizada, o que dalgunha maneira confirma un avanzado estado de xestación. O segundo aspecto que Kojima comentou é que aínda queda por puír o mundo como tal, un proceso longo ao tratarse dun terreo aberto de gran magnitude. Segundo as súas palabras, todos os días proba o xogo e “pide cambios”. Ao parecer, Death Stranding sufriu un leve atraso na súa produción ao deterse con estes detalles.

Kojima durante a entrevista para o medio xaponés J-Wave. Fonte: J-Wave,

Cuestionado por unha posible data de lanzamento ao mercado, ou mesmo interna, imposta por el mesmo, asegura que, aínda que hai un día estimado como máximo para entregar o título, non entregará un xogo que non alcance as súas esixencias. Con todo, ter unha data máis ou menos definida, a pesar de que non sexa pública, axúdalle a centrarse no obxectivo e a non traballar de maneira infinita no tempo.

Carlos Pereiro
Carlos Pereiro

Creador de Morcego. Escribo cousas, falo de cousas e encántame escoitar cousas.

Deixar un comentario

O teu enderezo electrónico non se publicará Os campos obrigatorios están marcados con *