Sony presenta un novo accesorio para o mando de PS4

Interesante proposta a que acaba de realizar Sony para os xogadores que buscan un maior rendemento no seu mando de PS4 ou mesmo pensando no futuro Dualshock 5. A compañía xaponesa vén de presentar un accesorio para a parte traseira do Dualshock 4, chamado Back Button Attachment. Segundo aseguran dende Sony, preténdese ofrecer máis versatilidade e rendemento ao xogar, mantendo a comodidade e a sensación do controlador inalámbrico.

Estes dous botóns poderán ser configurados para que interpreten o comando de calquera outro botón do mando, ademais de que grazas á pantalla OLED poderemos establecer até tres perfiles distintos cos que intercambiar entre as nosas configuracións predilectas. Por suposto, tamén se inclúe unha entrada para os auriculares e así poder escoitar o son do xogo a través do mando.