Skull & Bones non estará no Ubisoft Forward pero continúa o seu desenvolvemento

Hai xa varios anos que Ubisoft anunciou ao mundo Skull & Bones, o seu videoxogo de piratas e bucaneiros. Choveu moito desde aquel E3 do 2017 e o título tamén foi mudando e evolucionando. O certo é que se chegou a rumorear co reinicio case total do seu desenvolvemento, asunto máis que posíbel vendo o seu estado actual. Nun comunicado oficial, a compañía parisiense explica que seguen a traballar nel e que pronto ofrecerán novas, pero non estará no Ubisoft Forward programada para hoxe, 10 de setembro.

A directora creativa Elisabeth Pellen explica que o seu desenvolvemento volveuse máis ambicioso que antes, o cal explicaría a súa nova denominación como xogo ‘Cuádruplo A’: «moitos de vós preguntástesvos por que tivemos que pospoñer a estrea. A resposta é que simplemente precisábamos máis tempo. Soñamos algo máis grande para Skull & Bones, e esas ambicións supoñen naturalmente desafíos maiores».

 Seguindo o sinalado pola compañía, o desenvolvemento do proxecto abarca xa a 6 estudos diferentes de Ubisoft ao longo do mundo: Ubisoft Singapore, Berlin, Chengdu, Kiev, Paris e a súa sede de Filipinas. Tamén foron recrutados novos traballadores para a sede de Singapore, o equipo principal do xogo, para axudar co proxecto.